ஒரு காலத்தில் குடும்பத் தேவைக்கு மட்டுமே என இருந்த கறவை மாடு வளர்ப்பு, இன்று ஊரக மக்களின் வாழ்வாதாரத் தொழிலாக மாறியுள்ளது. செம்புகளில் கறந்த நிலை மாறி, குடங்களில் கறக்கும் அளவுக்குப் பாலைத் தரும் பசுக்கள் வந்து விட்டன.

வசதியான மக்கள் மட்டுமே பயன்படுத்தி வந்த பால், இன்று ஏழை, பணக்காரர் பேதமின்றி, எல்லோரும் பயன்படுத்தும் உணவுப் பொருளாக மாறி விட்டது.

எனவே, கறவை மாடுகள் வளர்ப்பில், அவற்றின் பராமரிப்பில் முக்கியக் கவனத்தைச் செலுத்த வேண்டிய நிலை ஏற்பட்டுள்ளது. ஏனெனில், இந்தக் கவனம் இருந்தால் மட்டுமே, பால் உற்பத்தியைப் பெருக்க முடியும், எல்லோருக்கும் தேவையான பாலை வழங்க முடியும்.

அதைப்போல, பாலை விதவிதமான உணவுகளாகத் தயாரித்து உண்பதற்கான பதன நுட்பங்களும் வந்து விட்டன. இவற்றையெல்லாம் முறையாக அறிந்து கொள்ளும் போது, கறவை மாடுகள் வளர்ப்பில் ஈடுபட்டுள்ள மக்கள், சிறந்த பொருளாதார மேம்பாட்டை அடைய முடியும்.

அந்த வகையில், கறவை மாடு வளர்ப்பு முறைகளையும், பாலிலிருந்து பல்வேறு உணவுப் பொருள்களைத் தயாரிக்கும் உத்திகளையும், பெரம்பலூர் மாவட்டம், வாலிகண்டபுரம் ஹன்ஸ்ரோவர் வேளாண்மை அறிவியல் நிலையத் தொழில் நுட்ப வல்லுநர்கள் மருத்துவர் பா.வினோத், செல்வி ச.கோகிலவாணி, திட்ட ஒருங்கிணைப்பாளர் முனைவர் வே.எ.நேதாஜி மாரியப்பன் ஆகியோர் சிறப்பாகத் தொகுத்துள்ளனர்.

அவர்களுக்குப் பச்சை பூமி சார்பில் பாராட்டையும் நன்றியையும் தெரிவித்துக் கொள்கிறோம். இந்த அருமையான நூலை, கறவை மாடுகளை வளர்ப்போரும், வளர்க்க விரும்புவோரும், படித்துப் பயனடைய வேண்டுகிறோம். நன்றி!

– பசுமை க.முருகேசன், பதிப்பாசிரியர்.