இயற்கை வேளாண்மை, சூழல் மேலாண்மையை நோக்கமாகக் கொண்டு 2011 ஆம் ஆண்டில் தொடங்கப்பட்டது பச்சை பூமி மாத இதழ். இதில், எல்லோரும் பாராட்டும் வகையில், விவசாயம், கால்நடை வளர்ப்பு, சுற்றுச்சூழல், மூலிகை சார்ந்த செய்திகளை வெளியிட்டு வருகிறோம்.

சுற்றுச்சூழலின் முக்கிய அங்கமாக விளங்கும், இயற்கை வேளாண்மையை வலியுறுத்தும் பச்சை பூமி இதழில், வேளாண்மை செழிப்பதற்கு உதவும் கால்நடை வளர்ப்புக் குறித்து, கால்நடை அறிவியல் அறிஞர்களும், இயற்கை வேளாண்மை குறித்து, வேளாண் அறிஞர்களும், பட்டறிவு மிகுந்த இயற்கை விவசாயிகளும், சூழல் அறிஞர்களும் இந்த இதழுக்கான செய்திகளை வழங்கி வருகிறார்கள்.

இது ஒருபுறம் இருக்க, விவசாய உத்திகள் அடங்கிய தரமான நூல்களை வெளியிடுவதும் எங்கள் நோக்கமாகும். இவ்வகையில், சீர்மிகு சாகுபடி நுட்பங்கள் தொகுதி 1, மலர்கள் சாகுபடி உத்திகள் அடங்கிய, சீர்மிகு சாகுபடி நுட்பங்கள் 2 ஆகிய இரண்டு நூல்களை வெளியிட்டுள்ளோம். இப்போது, பல்வேறு பயிர்களுக்கான சாகுபடி உத்திகள் அடங்கிய, சீர்மிகு சாகுபடி நுட்பங்கள் தொகுதி 3 என்னும் இந்நூலை வெளியிட உள்ளோம்.

திருவாரூர் மாவட்டம் நீடாமங்கலம் வேளாண்மை அறிவியல் நிலைய உதவிப் பேராசிரியர் முனைவர் இராஜா.ரமேஷ், திருவண்ணாமலை மாவட்டம் கீழ்நெல்லி வேளாண்மை அறிவியல் நிலையத் தொழில் நுட்ப வல்லுநர் ப.நாராயணன், கோவைக் காருண்யா பல்கலைக்கழக மண்ணியல் துறை துணைப் பேராசிரியர் முனைவர் வி.சு.சுகந்தி ஆகியோர் எழுதிய கட்டுரைகள் இந்த நூலில் இடம் பெற்றுள்ளன.

வேளாண் பெருமக்களுக்கு இந்த நூல் பயனுள்ள நூலாக விளங்கும் என்பதில் எங்களுக்கு ஐயமில்லை. கட்டுரைகளை வழங்கிய வல்லுநர் பெருமக்களுக்கு இந்த நேரத்தில் நன்றியைத் தெரிவித்துக் கொள்கிறோம். வேளாண்மை செழிக்க உதவும் இந்த நூலை, அனைவரும் வாங்கிப் படித்துப் பயனடைய வேண்டுகிறோம்.

– பசுமை க.முருகேசன், பதிப்பாசிரியர்.