உணவு உற்பத்தியைப் பெருக்கும் நோக்கிலும், வேளாண் பெருமக்களின் வாழ்வாதாரத்தை உயர்த்தும் நோக்கிலும், ஒவ்வொரு பயிர் வகையிலும், புதுப் புது இரகங்கள் வந்து கொண்டே உள்ளன. இந்த இரகங்களைப் பயிரிடும் போது, அவற்றின் வளர்ச்சிக்கு உகந்த உத்திகளைப் பயன்படுத்த வேண்டும். அப்படியில்லாத நிலையில், மகசூல் இழப்பையே விவசாயிகள் சந்திக்க நேரிடும்.

இந்நிலையைத் தவிர்க்க, சரியான தொழில் நுடபங்களை விவசாயப் பெருமக்களிடம் கொண்டு சேர்க்க வேண்டும். இந்த வேலையை ஒருமுறையல்ல, பலமுறை தொடர்ந்து செய்து கொண்டே இருக்க வேண்டும். இந்தப் பணியில் தன்னை முழுமையாக ஈடுபடுத்திக் கொண்டுள்ளது, 2011 ஆம் ஆண்டிலிருந்து வெளிவரும் விவசாய மாத இதழான பச்சை பூமி.

மேலும், பச்சை பூமி சார்பில், விவசாயம் மற்றும் விவசாயம் சார்ந்த தொழில் நுட்பங்கள் அடங்கிய நூல்களும் வெளியிடப்படுகின்றன. இவ்வகையில், துல்லிய சாகுபடி முறைகள் என்னும் இந்நூல், பச்சை பூமியின் இருபதாம் நூலாகும்.

உணவுப் பயிர்கள், எண்ணெய்ப் பயிர்கள், பணப்பயிர்கள் போன்றவற்றின் சாகுபடியில் கையாள வேண்டிய தொழில் நுடபங்கள் இந்நூலில் சிறப்பாக விளக்கப்பட்டு உள்ளன. மேலும், பாசனம் செய்தல் உள்ளிட்ட பல்வேறு உத்திகள் இந்நூலில் இடம் பெற்றுள்ளன.

இந்நூலைச் சிறப்பாகவும், விவசாயிகள் எளிதில் புரிந்து கொள்ளும் வகையிலும், தயாரித்துக் கொடுத்துள்ள முனைவர் வி.அரவிந்த், க.திவ்யா, முனைவர் சு.திருமேனிநாதன், முனைவர் நா.சா.சுடர்மணியன் ஆகியோருக்குப் பச்சை பூமியின் சார்பில் நெஞ்சார்ந்த நன்றியைக் காணிக்கை ஆக்குகிறோம். மேலும், வாய்ப்புள்ள விவசாயிகள் அனைவரும் இந்நூலை வாங்கிப் படித்துப் பயனடைய வேண்டுகிறோம்.

– பசுமை க.முருகேசன், பதிப்பாசிரியர்.