முனைவர் கோ.கலைச்செல்வி, இலங்கை யாழ்ப்பாணத்தைப் பிறப்பிடமாகக் கொண்ட திரு.கோவிந்தன் என்பவரின் மகளாவார். தமிழ்நாட்டில் பள்ளிப் படிப்பையும், 2005 இல், இளங்கலைக் கால்நடைப் படிப்பையும், 2008 இல், கால்நடை முதுகலைப் படிப்பையும் முடித்த இவர், 2012 இல், சென்னைக் கால்நடை மருத்துவக் கல்லூரியில் உதவிப் பேராசிரியராகச் சேர்ந்துள்ளார். இப்போது, சென்னை மாதவரம் பால்பண்ணை வளாகத்தில் அமைந்துள்ள தமிழ்நாடு கால்நடை மருத்துவ அறிவியல் பல்கலைக் கழகத்தின் கால்நடை நலக் கல்லூரியில் உதவிப் பேராசிரியராகப் பணியாற்றி வருகிறார்.

இதற்கு முன், 2008-2009 இல், கேரள மாநிலக் கால்நடை மருத்துவக் கல்லூரியில் உயிர் வேதியியல் துறையில் விரிவுரையாளராகப் பணியாற்றியுள்ளார். 2008 இல், இந்திய அளவில் நடத்தப்பட்ட இந்திய விவசாயத் துறை விரிவுரையாளர்கள் தகுதித் தேர்வில் தென்னிந்திய அளவில் இவர் இரண்டாம் இடத்தைப் பிடித்துள்ளார். 2009 இல், தமிழ்நாடு அரசுப் பணியாளர் தேர்வாணையத்தின் மூலம் கால்நடை உதவி மருத்துவராகத் தேர்வு செய்யப்பட்டு, பல்வேறு மாவட்டங்களில் பணியாற்றி உள்ளார்.

2015-2016 இல், கால்நடை மூலிகை மருத்துவச் சான்றிதழ் படிப்பையும், 2017-2022 இல், முனைவர் பட்டப் படிப்பையும் முடித்துள்ளார். தேசிய மற்றும் உலகளவில் முப்பதுக்கும் மேற்பட்ட ஆய்வுக் கட்டுரைகளைப் பல்வேறு மாநாடுகளில் சமர்ப்பித்துப் பரிசுகளைப் பெற்றுள்ள இவர், நூற்றுக்கும் மேற்பட்ட விவசாயம், கால்நடை மருத்துவம் சார்ந்த விழிப்புணர்வுக் கட்டுரைகள் மற்றும் நூல்களை எழுதியுள்ளார்.

மேலும், ஆடு, மாடு, கோழி போன்ற கால்நடைப் பண்ணைகளை அமைக்க விரும்பும் விவசாயிகளுக்கு இலவசமாக ஆலோசனைகளை வழங்கி வருகிறார். வார விடுமுறை நாட்களில் கால்நடைகளுக்கு இலவசமாக மருத்துவ சேவை செய்து வருகிறார். மூலிகை மருத்துவ ஆராய்ச்சியிலும் கோழி மற்றும் கால்நடைகளைத் தாக்கும் நுண்ணுயிரிகளைக் கண்டறிதல் மற்றும் அவற்றுக்கான தடுப்பு மருந்துகளைக் கண்டறியும் ஆராய்ச்சிகளிலும் ஈடுபட்டு வருகிறார்.