ஆனா ஆவன்னா தெரியாத அம்மாவின் முந்திச் சேலையைத் தவிர, எனக்கு வேறெந்தத் துணையும் இருந்ததில்லை; கிடைக்கவில்லை. கல்வியில், வேலை வாய்ப்பில் என் இலக்கு நோக்கி என்னால் நகர முடியவில்லை. அகவை நாற்பது வரையில் ஆதரவற்ற விவசாயியாக மட்டுமே வயல் வரப்புகளில் வியர்வை சிந்த உழைத்துக் கிடந்த நான், இப்போது இந்த நூலைப் பதிப்பிக்கும் தகுதியில் இருக்கிறேன் என்பதை என்னால் நம்ப முடியவில்லை.

நாம் நினைப்பது நடப்பதில்லை; எந்தச் சூழலிலும் நம் சிந்தனையில் எட்டாதது நடக்கிறது என்றால், அதைக் கர்ம வினை என்று தான் சொல்ல வேண்டும். இந்த நூலின் ஆசிரியருக்கும் எனக்கும் இடையிலான நட்புங்கூட அப்படிப்பட்டது தான். இந்தக் கர்ம வினை, என்னை ஊருக்கு நல்லது செய்வோனாக மட்டுமே அழைத்துச் செல்ல வேண்டும் என்று, நான் வணங்கும் இறைவனை வேண்டிக் கொள்கிறேன்.

வேடதாரிகள் கூடச் சிரித்துப் பேசி விட்டால், சிந்தையில் இருப்பதை யெல்லாம் கொட்டி விடும் வெள்ளந்தி மனிதன் நான். நம்மால் இயலும் உதவிகளையெல்லாம் அடுத்தவர்களுக்குச் செய்ய வேண்டும் என்னும் எண்ணம் கொண்டவன். அதற்கு, நான் உயர வேண்டும். அப்போது தான் என் எண்ணம் செயலாகும்.

அதன் விளைவு தான் பச்சை பூமி மாத இதழ், பச்சை பூமி பதிப்பகம், பச்சை பூமி இணையதளம், இன்னும் எடுத்து வரும் முயற்சிகள் எல்லாம். அடுத்த நேரம் என்ன செய்யப் போகிறோம் என்று, ஒன்றும் புரியாமல் சென்னையில் அலைந்து திரிந்தவன் கைகளில் இத்தனை அருமைமிகு அடையாளங்கள் வந்து சேர்ந்துள்ளன என்றால், இதற்குக் காரணம், கர்ம வினை என்று தானே சொல்ல முடியும்?

இப்பிறவியின் நோக்கம், என் பசியை, என்னைச் சார்ந்தோர் பசியை ஆற்றுவதும்; நானும் என்னைச் சார்ந்தோரும் சுகமாக வாழ்வதும் மட்டுமல்ல. நான் வாழும் மண்ணுக்கு, சமூகத்துக்கு ஆற்ற வேண்டிய கடமைகள் எண்ணற்றவை. அந்த உணர்வின் சிறிய வெளிப்பாடு தான் பச்சை பூமி.

கடந்த 2011 ஆம் ஆண்டில் இருந்து பச்சை பூமி என்னும் மாத இதழை, விவசாயச் சமூகம் மேம்படும் நோக்கில் வெளியிட்டு வருகிறோம். மேலும், வேளாண்மை என்னும் வாழ்வியல் சார்ந்த நூல்களையும் தொடர்ந்து பதிப்பித்து வருகிறோம். இவ்வகையில், இருபத்து மூன்று நூல்களைப் பதிப்பித்து உள்ளோம். மெய்யெழுத்துகள் என்னும் இந்தக் கவிதை நூல் இருபத்து நான்காம் நூலாகும்.

மேலும், வேளாண்மை மேம்படக் களப்பணியும் அவசியம் என்பதை உணர்ந்து, மாவட்டம் தோறும் வேளாண்மைக் கண்காட்சிகளை, வேளாண் குடிமக்கள் பயனுறும் வகையில் சிறப்பாக நடத்தி வருகிறோம். பஞ்சம் பிழைக்க வந்த பாமர விவசாயி, உணவு உற்பத்திக்கான நூல்களைத் தொடர்ந்து பதிப்பித்து வருவதும், தொடர்ந்து களத்தில் இயங்கி வருவதும் கர்ம வினை தான். என் கடன் பணி செய்து கிடப்பதே!

அணிந்துரை, மதிப்புரை என்று, சான்றோர்கள் சிலர், இந்நூலின் கவிதைகள் குறித்துப் பேசியிருப்பதால் நானும் அதற்குள் செல்ல விரும்பவில்லை. இந்த நூலில் இடம் பெற்றுள்ள கவிதைகள் அனைத்தும் இயற்கை சார்ந்தவை; பச்சை பூமி இதழில் வெளியானவை. இந்த இதழ் இவருக்கு உந்து சக்தியைக் கொடுத்து எழுத வைத்தது; கவிஞர் என்னும் அடைமொழியைக் கொடுத்தது. இதை இன்னும் மெருகேற்றிக் கொண்டு தொடர்ந்து பல கவிதை நூல்களைப் படைக்க வாழ்த்துகிறேன்.

– பசுமை க.முருகேசன், பதிப்பாசிரியர்.