உலக வாழ்வின் மூல ஆதாரம் உணவு. இந்த உணவை நோக்கியே அனைத்து உயிர்களும் இயங்கி வருகின்றன. உணவு உற்பத்தியில் சிறந்து விளங்கும் நாடு, ஏனைய எல்லாத் துறைகளிலும் சிறப்புடன் விளங்கும். காலச் சூழலுக்கு ஏற்ப, உணவு உற்பத்திக்கான பயிர் வகைகள் நாட்டுக்கு நாடு வேறுபடும். தனித் தன்மைமிக்க பயிர் வகைகளைக் கொண்டுள்ள நாடுகளும் உள்ளன.

இவ்வகையில், நீர்வளம், நிலவளம் உள்ளிட்ட இயற்கை வளங்கள் சிறந்து விளங்கும் இடங்களிலும், வறட்சி, வெள்ளம், சீரற்ற மண் போன்ற இயற்கை வளங்கள் சீரற்று விளங்கும் பகுதிகளிலும், நன்கு வளர்ந்து மகசூலை அள்ளித் தரும் எண்ணற்ற பாரம்பரிய நெல் இரகங்களைக் கொண்டது நமது நாடு.

காலநிலை மாற்றங்களுக்கு ஏற்ப, தம்மை மாற்றிக் கொண்டு, பூச்சிகள் மற்றும் நோய்களின் தாக்குதல்களைத் திறம்பட எதிர் கொண்டு விளையும் நமது பாரம்பரிய நெல் இரகங்கள் மருத்துவக் குணங்கள் நிறைந்தவை. மருந்தாக விளங்கிய அந்த உணவுகள், அறிவியல் வேளாண்மை, நாகரிக வாழ்க்கை போன்றவற்றால் புறந்தள்ளப்பட்டன.

ஆனால், இரசாயன வேளாண்மையால், நீரில், நிலத்தில், காற்றில் உண்டாகி வரும் மாறுதல்கள், எஞ்சிய நஞ்சு கலந்த உணவுகளை உண்பதால் உடல் நலத்தில் நிகழ்ந்து வரும் பக்க விளைவுகள் ஆகியன, மீண்டும் நம் பாரம்பரியப் பயிர்களை நோக்கி நம்மைத் திரும்ப வைத்துள்ளன.

அதனால், அமைதியான பூங்காற்றைப் போல, நமது மரபு சார்ந்த விவசாயமும், பயிர் இரகங்களும் தமிழகம் முழுவதும் பரவி வருகின்றன.

இவற்றை ஊக்கப்படுத்தும் வகையில், முனைவர் வே.கிருஷ்ணன், முனைவர் அ.அனுராதா, முனைவர் மு.தமிழரசி, முனைவர் த.ஆனந்தன் ஆகியோர், பாரம்பரிய நெல் இரகங்களும் அவற்றின் சிறப்புகளும் என்னும் நூலை எழுதியிருப்பது பாராட்டுக்கு உரியது. இந்நூல், பாரம்பரிய நெல் இரகங்களின் ஆய்வு நூலாக விளங்குகிறது. நூலாசிரியர்களின் இந்தப் பெருமுயற்சி, நமது அங்கக விவசாயம் மற்றும் மரபு சார்ந்த நெல் இரகங்களை முன்னெடுத்துச் செல்வதில் பெரும் பங்காற்றும்.

எனவே, பச்சை பூமி பதிப்பகம் சார்பில் இந்நூலை வெளியிடுவதில் பெருமை கொள்கிறோம். இயற்கை நல ஆர்வலர்கள், இயற்கை விவசாயிகள், நமது வாழ்வியல் தொன்மைப் பற்றாளர்கள் போன்றோர் இந்நூலை வாங்கிப் படித்து, தமிழகம் முழுவதும் பரப்பிட வேண்டுகிறோம்.

– பசுமை க.முருகேசன், பதிப்பாசிரியர்.