பச்சை பூமி தமிழகத்தின் முன்னணி வேளாண்மை இதழ். இதன் மூலம், மாதந்தோறும் விவசாயம் சார்ந்த அறிவியல் மற்றும் அனுபவ உத்திகளை விவசாயிகளுக்கு வழங்கி வருகிறோம். மேலும், விவசாயிகளுக்குத் துணை நிற்கும் கால்நடைகள் வளர்ப்பு மற்றும் மரம் வளர்ப்பு, மழைநீர்ச் சேமிப்பு, நிலத்தடி நீர்ப் பாதுகாப்பு, மண்வளப் பாதுகாப்பு உள்ளிட்ட சூழல் மேம்பாட்டு உத்திகளையும் இந்த இதழில் வெளியிட்டு வருகிறோம்.

இத்துடன் நில்லாமல், வேளாண்மைச் செய்திகளைத் தரமான நூல்களாக வெளியிட வேண்டும் என்பதும் எங்கள் நோக்கம். அந்த வகையில், சீர்மிகு சாகுபடி நுட்பங்கள் வரிசையில் இதுவரை இரண்டு தொகுதிகளை வெளியிட்டுள்ளோம். காய்கறிகள் உற்பத்தியைப் பற்றிய முழுமையான செய்திகள் அடங்கிய, சீர்மிகு சாகுபடி நுட்பங்கள் – தொகுதி 3 என்னும் இந்நூல், பச்சை பூமி வெளியிடும் மூன்றாம் நூலாகும்.

காய்கறிகள் நமக்கு உணவுப் பொருளாக மட்டுமில்லாமல், மருந்தாகவும் செயலாற்றி, நம் உடல் நலத்தைக் காக்கின்றன. இதைப்போல, விவசாயிகளுக்கு நல்ல வருவாயைத் தரும் பொருள்களாகவும் காய்கறிகள் உள்ளன. எனவே, விவசாயிகள், அவரவர் சூழ்நிலைக்கு ஏற்ற காய்கறிகளைப் பயிரிட ஏதுவாக, அனைத்துக் காய்கறிகள் சாகுபடி உத்திகளையும் நூலாகத் தயாரித்துள்ளோம்.

விவசாயிகளுக்கு எளிதில் புரியும் வகையில் இந்நூலை எழுதியுள்ள முனைவர் க.வைதேகி, முனைவர் வி.சு.சுகந்தி ஆகியோருக்கும், பயிர்ப் பாதுகாப்பு உத்திகளை மேலாய்வு செய்து கொடுத்து உதவிய, காட்டுப்பாக்கம் வேளாண்மை அறிவியல் நிலைய உதவிப் பேராசிரியர் முனைவர் காயத்ரி சுப்பையா அவர்களுக்கும் நெஞ்சார்ந்த நன்றியைத் தெரிவித்துக் கொள்கிறோம். காய்கறிகள் சாகுபடிக்கு வழிகாட்டியாக விளங்கும் இந்நூலை, விவசாயிகள் அனைவரும் வாங்கிப் படித்துப் பயனடைய வேண்டுகிறோம்.

– பசுமை க.முருகேசன், பதிப்பாசிரியர்.