நொடிக்கு நொடி பெருகிக் கொண்டிருக்கிறது மக்கள் தொகை. பெருகி வரும் இந்த மக்களின் பசியைப் போக்க வேண்டுமெனில், விவசாயமும் நாளுக்கு நாள் வளர்ச்சியடைய வேண்டும். எனவே, உணவு உற்பத்தியைப் பெருக்கவும், வேளாண் பெருமக்களின் வாழ்வாதாரத்தை உயர்த்தவும், புதிய புதிய பயிர் இரகங்கள் வந்து கொண்டே உள்ளன.

இந்த இரகங்களைப் பயிரிடும் போது, அவற்றின் விளைச்சலுக்கு ஏற்ற தொழில் நுட்பங்களைப் பயன்படுத்த வேண்டும். இல்லையேல், விவசாயிகள் மகசூல் இழப்பைச் சந்திக்க நேரிடும். இந்நிலையைத் தவிர்க்க, சரியான தொழில் நுட்பங்களை விவசாயப் பெருமக்களிடம் கொண்டு சேர்க்க வேண்டும். இந்த வேலையை ஒருமுறையல்ல, பலமுறை தொடர்ந்து செய்து கொண்டே இருக்க வேண்டும்.

இந்தப் பணியில், 2011-ஆம் ஆண்டிலிருந்து வெளிவரும் விவசாய மாத இதழான பச்சை பூமி, தன்னை முழுமையாக ஈடுபடுத்திக் கொண்டுள்ளது, மேலும், பச்சை பூமி சார்பில், விவசாயம் மற்றும் கால்நடை வளர்ப்புச் சார்ந்த உத்திகளைக் கொண்ட நூல்களும் வெளியிடப்படுகின்றன. இவ்வகையில், தோட்டக்கலை சாகுபடி உத்திகள் என்னும் இந்நூல், பச்சை பூமியின் முப்பதாம் நூலாகும்.

காய்கறிகள், பழவகைகள், மலர்ப் பயிர்கள், மரப்பயிர்கள் போன்றவற்றில் அதிக மகசூலைப் பெறுவதற்கான அறிவியல் சார்ந்த உத்திகள், இந்நூலில் சிறப்பாகக் கூறப்பட்டு உள்ளன. மேலும், ஊடுபயிர் சாகுபடி முறைகள் போன்ற பல்வேறு உத்திகள் இந்நூலில் இடம் பெற்றுள்ளன.

விவசாயிகள் படித்துப் புரிந்து கொள்ளும் வகையில், தொழில் நுட்பங்களைச் சிறப்பாக வழங்கியுள்ள முனைவர் சு.சுகன்யா, முனைவர் கா.பரமேஸ்வரி, முனைவர் ச.வள்ளல் கண்ணன், முனைவர் வே.விஜயகீதா, முனைவர் மு.சண்முகநாதன், வி.வ.சங்கீதா ஜெபலின் ஆகியோருக்குப் பச்சை பூமியின் சார்பில், நெஞ்சார்ந்த நன்றியைத் தெரிவித்துக் கொள்கிறோம். மேலும், விவசாயிகள் அனைவரும் இந்நூலை வாங்கிப் படித்துப் பயனடைய வேண்டுகிறோம்.

– பசுமை க.முருகேசன், பதிப்பாசிரியர்.