அழகு மீன் வளர்ப்பு என்பது, ஆடம்பரம், வசதியுள்ளோர் செய்வது என்னும் நிலையில் இருந்து, மக்களின் மன மகிழ்ச்சிக்குக் காரணமாக இருப்பதாகக் கருதப்படுவதால் இது அவசியம், எல்லோரும் மேற்கொள்ளலாம் என்னும் நிலைக்கு வந்துள்ளது. அவரவர் வசதிக்கு ஏற்ப அழகு மீன்களை வளர்க்கும் சூழல் ஏற்பட்டுள்ளது. சில நூறு ரூபாயில் இருந்து பல இலட்சம் டாலர்கள் வரையென, அழகு மீன்களின் விலை நிலவரம் உள்ளது.

மேலும், உலகளவில் அழகு மீன்கள் வளர்ப்பைப் பெரும்பாலான மக்கள் விரும்புவதால், அழகு மீன் வணிகம் தனிப்பெரும் தொழிலாக மாறியுள்ளது. எண்ணற்ற மக்களின் வாழ்வாதாரமாக விளங்கும் அழகு மீன் வணிகத்தில், ஒவ்வோர் ஆண்டும் பல கோடி ரூபாய்கள் புழங்குகின்றன.

எனவே, அழகு மீன்களைப் பற்றியும், அவற்றின் வளர்ப்பு முறைகளைப் பற்றியும், பச்சை பூமி மாத இதழில் தொடர்ந்து சொல்லி வந்தோம். இவற்றைத் தொகுத்து நூலாக வெளியிட்டால், அழகு மீன் வளர்ப்பில் மற்றும் வணிகத்தில் ஈடுபட்டுள்ள மக்களுக்குப் பயனுள்ளதாக இருக்கும் என்னும் எண்ணத்தில், அலங்கார மீன்கள் என்னும் தலைப்பில் வெளியிடுகிறோம்.

ஈரோடு மாவட்டம், பவானிசாகர் வளங்குன்றா நீருயிரி வளர்ப்பு மையத்தில் உதவிப் பேராசிரியராக இருக்கும் முனைவர் சா.ஆனந்த், நாகை மாவட்டம், தலைஞாயிறு டாக்டர் எம்.ஜி.ஆர். மீனவளக் கல்லூரியில் முதுநிலை ஆய்வாளராக இருக்கும் முனைவர் ச.சுதர்சன், பவானிசாகர் வளங்குன்றா நீருயிரி வளர்ப்பு மைய முதுநிலைக் கல்வி மாணவர் ஸ்ரீ.ஜெயப்பிரகாஷ் சபரி ஆகியோர் எழுதிய கட்டுரைகள் இந்த நூலில் இடம் பெற்றுள்ளன. அவர்களுக்குப் பச்சை பூமியின் சார்பில் நெஞ்சார்ந்த நன்றியைத் தெரிவித்துக் கொள்கிறோம்.

பச்சை பூமி வெளியிட்டு வரும் வாழ்வியல் பயனுள்ள நூல்கள் வரிசையில், இந்த நூல் பச்சை பூமியின் பன்னிரண்டாம் வெளியீடாகும். இந்த நூலை வாய்ப்புள்ள அனைவரும் வாங்கிப் படித்துப் பயனடைய வேண்டுகிறோம்.

– பசுமை க.முருகேசன், பதிப்பாசிரியர்.