மண்ணும் மன்னுயிரும் வாழும் வகை செய்வோம் என்னும் இலக்கில், இயற்கை வேளாண்மை மற்றும் சூழல் மேலாண்மையை வலியுறுத்தி, பச்சை பூமி என்னும் மாத இதழை 2011 ஆம் ஆண்டில் இருந்து வெளியிட்டு வருகிறோம். விவசாயம், கால்நடை வளர்ப்பு, மரம் வளர்ப்பு, மழைநீர்ச் சேமிப்பு, நிலத்தடி நீர்ப் பாதுகாப்புப் போன்ற, மக்கள் மற்றும் மண்வளம் காக்கும் செய்திகளை இந்த இதழில் வெளியிடுகிறோம்.

இதுமட்டுமின்றி, மக்களுக்குப் பயனுள்ள செய்திகளைக் கொண்ட நூல்களையும் வெளியிடுவது எங்களின் நோக்கமாகும். இந்த வகையில், சீர்மிகு சாகுபடி நுட்பங்கள் வரிசையில் மூன்று தொகுதிகளை வெளியிட்டுள்ளோம். அந்த வரிசையில், விவசாயம் சிறக்க உதவும் இடுபொருள்கள் அடங்கிய இந்நூல் நான்காம் நூலாகும்.

இயற்கை விவசாயத்துக்கு உதவும், பஞ்சகவ்யா, தசகவ்யா, மீன் அமிலம், அமுதக் கரைசல், தேமோர்க் கரைசல், அரப்பு மோர்க் கரைசல், தொல்லுயிரிக் கரைசல், பூச்சி விரட்டி, காய்ப்புழு விரட்டி, இலைப்பேன் விரட்டி, இலைத் துளைப்பான் விரட்டி, நோய் விரட்டி ஆகியவற்றைத் தயாரித்துப் பயன்படுத்தும் முறைகளைப் பற்றி, இந்நூல் தெளிவாக விளக்குகிறது.

மேலும், பல பயிர்கள் சாகுபடி, ஒட்டுண்ணிகள், இனக்கவர்ச்சிப்பொறி, விளக்குப்பொறி, ஒட்டுப்பொறி, ஊடுபயிர்கள், உயிர் உரங்கள் போன்ற, இயற்கை விவசாயம் பெருக உதவும் செய்திகளும் இதில் இடம் பெற்றுள்ளன. இது விவசாயிகளுக்கு மிகமிக உதவியாக இருக்கும்.

இந்நூலை, பதிப்பாசிரியராகிய நான் எல்லோருக்கும் எளிதாகப் புரியும் வகையில் எழுதியும், பிற வல்லுநர்களின் செய்திகளைத் தொகுத்தும் இந்நூலில் கூறியுள்ளேன்.  இது அனைத்து விவசாயிகளிடமும் இருக்க வேண்டிய நூல். வாங்கிப் படித்துப் பயனடைய வேண்டுகிறோம்.

– பசுமை க.முருகேசன், பதிப்பாசிரியர்.