பசிப்பிணி, எல்லோருக்கும் வருவது. உணவால் மட்டுமே இதைத் தீர்க்க முடியும். நொடிக்கு நொடி பெருகிக் கொண்டிருக்கும் மக்களின் பசியைப் போக்க வேண்டுமெனில், விவசாயமும் நாளுக்கு நாள் வளர்ச்சியடைய வேண்டும். எனவே, உணவு உற்பத்தியைப் பெருக்கும் நோக்கிலும், வேளாண் பெருமக்களின் வாழ்வாதாரத்தை உயர்த்தும் நோக்கிலும், ஒவ்வொரு பயிர் வகையிலும், புதுப்புது இரகங்கள் வந்து கொண்டே உள்ளன.

இந்த இரகங்களைப் பயிரிடும் போது, அவற்றின் வளர்ச்சிக்கு உகந்த உத்திகளைப் பயன்படுத்த வேண்டும். இல்லையெனில், மகசூல் இழப்பையே விவசாயிகள் சந்திக்க நேரிடும். இந்நிலையைத் தவிர்க்க, சரியான தொழில் நுட்பங்களை விவசாயப் பெருமக்களிடம் கொண்டு சேர்க்க வேண்டும். இந்த வேலையை ஒருமுறை இருமுறையல்ல, பலமுறை தொடர்ந்து செய்து கொண்டே இருக்க வேண்டும்.

இந்தப் பணியில் தன்னை முழுமையாக ஈடுபடுத்திக் கொண்டுள்ளது, 2011-ஆம் ஆண்டிலிருந்து வெளிவரும் விவசாய மாத இதழான பச்சை பூமி. மேலும், பச்சை பூமி சார்பில், விவசாயம் மற்றும் விவசாயம் சார்ந்த உத்திகளைக் கொண்ட நூல்களும் வெளியிடப்படுகின்றன. இவ்வகையில், மானாவாரி சாகுபடி உத்திகள் என்னும் இந்நூல், பச்சை பூமியின் இருபத்து ஒன்பதாம் நூலாகும்.

மழைநீரை மட்டுமே நம்பிப் பயிரிடக்கூடிய மானாவாரி நில மேம்பாடு, அங்கே விளையும் உணவுப் பயிர்கள், பயறுவகைப் பயிர்கள், எண்ணெய்ப் பயிர்கள், பழப்பயிர்கள் போன்றவற்றில் கையாள வேண்டிய உத்திகள், இந்நூலில் சிறப்பாக விளக்கப்பட்டு உள்ளன. மேலும், பல்வேறு உத்திகள் இந்நூலில் இடம் பெற்றுள்ளன.

இந்நூலைச் சிறப்பாகவும், விவசாயிகள் எளிதில் புரிந்து கொள்ளும் வகையிலும், தயாரித்துக் கொடுத்துள்ள முனைவர் ந.சதீஸ்குமார், முனைவர் ப.துக்கையண்ணன், முனைவர் ஆ.அழகேசன், முனைவர் இரா.நாகேஷ்வரி, முனைவர் ரா.ராதா ஜெயலட்சுமி, முனைவர் செ.க.நடராஜன் ஆகியோருக்கு, பச்சை பூமியின் சார்பில் நெஞ்சார்ந்த நன்றியைத் தெரிவித்துக் கொள்கிறோம். மேலும், வாய்ப்புள்ள விவசாயிகள் அனைவரும் இந்நூலை வாங்கிப் படித்துப் பயனடைய வேண்டுகிறோம்.

– பசுமை க.முருகேசன், பதிப்பாசிரியர்.