விவசாயிகளைக் கைவிடாத விளைபொருள்கள் மலர்கள். மனிதனின் பிறப்பு முதல் இறப்பு வரையில் நிகழும் முக்கிய நிகழ்வுகளில் எல்லாம் முந்தியிருக்கும் இந்த மலர்கள். அக்கறையுடன் குறைந்த பரப்பில் சாகுபடி செய்தாலும் போதும்; ஒரு குடும்பத்தின் பொருளாதாரத் தேவையைச் சரிக்கட்டும் அளவுக்குப் பணத்தைக் கொடுத்து விடும். பாசனப் பற்றாக்குறை இருக்கும் இடங்களுக்கும், கொஞ்சம் போல நிலம் உள்ளவர்களுக்கும் ஏற்றது மலர்ப் பயிர்கள் சாகுபடி.

அவரவர் சூழலுக்குத் தக்கபடி மலர்ப் பயிர்களைச் சாகுபடி செய்யலாம். உள்ளூரில் தொடங்கி உலகம் முழுவதும் பூக்களுக்கான சந்தை விரிந்து கிடக்கிறது. அதாவது, உள்ளூரிலும் விற்கலாம்; வெளிநாடுகளிலும் விற்கலாம். பூக்களின் வகைகள் மற்றும் பூக்களின் தரத்துக்குத் தகுந்த விலை கிடைக்கும். அதனால் தான், வாழ்வாதாரம் வேண்டுமே என்பதற்காக ஏழை விவசாயிகளும், வளங்கொழிக்க வேண்டும் என்பதற்காக வசதி படைத்தவர்களும் மலர்கள் உற்பத்தியில் ஆர்வமுடன் ஈடுபட்டு வருகிறார்கள்.

இப்போது நிலவும் வறட்சியான சூழலில் சிறு குறு விவசாயிகளைக் காப்பது மலர்ப் பயிர்கள் சாகுபடி. அதனால், மலர்கள் உற்பத்திக் குறித்த தொழில் நுட்பங்களை, அவர்கள் எளிதில் அறிந்து பயனடைய வேண்டும் என்னும் நோக்கத்தில் இந்த நூல் வெளியிடப்படுகிறது.

எல்லாப் பயிர்களுக்குமான சாகுபடி நுட்பங்களை விவசாயிகளுக்குத் தெளிவாகச் சொல்ல வேண்டும் என்பது எங்களின் நோக்கம். அந்த வகையில், விவசாயிகளுக்குத் தேவையான தொழில் நுட்பங்களை நூல்களாகத் தயாரித்துத் தொடர்ந்து வெளியிட உள்ளோம். தொடக்கமாக, சிறு குறு விவசாயிகளுக்கும், பெரு விவசாயிகளுக்கும் பயன்படும் வகையில், மலர்கள் உற்பத்தி நுட்பங்கள் என்னும் இந்நூலை வெளியிடுகிறோம்.

இந்த நூலை, கோவைக் காருண்யா பல்கலைக் கழக மண்ணியல் மற்றும் வேளாண் வேதியியல் துறையின் துணைப் பேராசிரியர் முனைவர் வி.சு.சுகந்தி அவர்களும், முனைவர் க.வைதேகி அவர்களும் எழுதியுள்ளனர். மலர்கள் உற்பத்தியைப் பற்றிய தொழில் நுட்பங்களை விவசாயிகள் புரிந்து கொள்ளும் வகையில், மிக எளிமையாகச் சொல்லியுள்ளனர். அவர்களுக்கும், பயிர்ப் பாதுகாப்புத் தொழில் நுட்பங்களை மேலாய்வு செய்து கொடுத்த, காஞ்சிபுரம் மாவட்டம், காட்டுப்பாக்கம் வேளாண்மை அறிவியல் நிலைய உதவிப் பேராசிரியை முனைவர் காயத்ரி சுப்பையா அவர்களுக்கும், மேலும், இந்த நூல் சிறப்பாக வெளியாக உதவிய அத்தனை பேருக்கும் பச்சை பூமியின் சார்பில் நெஞ்சார்ந்த நன்றியைத் தெரிவித்துக் கொள்கிறோம்.

– பசுமை க.முருகேசன், பதிப்பாசிரியர்.